هَمّ يُضحِك !!

قفشات مضحكة جدا جدا بمناسبة أحداث تونس لا تفوتكم :

يعني إيه كوك زيرو : يعني البرادعي يطالب بالتغيير في مصر، و الشعب يستجيب في تونس.

الفرق بين الشعب المصري والتونسي ان الشعب التونسي تقول له ثور فيثور والشعب المصري تقول له ثور يقول احلبوه .

إذا الشعب يوماً أراد الحياة فلابد أن يستجيب ……البقر .

أنباء عن نية البرادعي الهجرة إلى تونس .

تونس اختارت التغيير و مصر اختارت شيبسي بالجمبري.

الحرية لا تأتي هوم ديليفري .

الشعب التونسى أراد الحياة فاستجاب القدر .. الشعب المصرى أراد “الحياة” لقاها على تردد 11255 أفقى .

بمناسبة التغيير .. احنا اكبر تغيير حصل في بلدنا الفترة اللي فاتت نزول جدو في اخر ربع ساعة يجيب جون.

خبر فات الصحافة القومية النهارده : الحكومه تمنح كل مواطن فيلا في مدينتي وعربيه وعروستين واحده مصري وواحده صيني وشاليه في بورتو مارينا

ليه شباب تونس بيتظاهروا في الشوارع هو مفيش عندهم فيسبوك

اتجاه في الحكومة لزيادة أسعار المحروقات مرة أخرى !!
ذكرت وكالة أنباء الشرق " الأوطى " أنه بعد أن أعلنت الحكومة المصرية عزمها ارجاء الزيادات المقررة على أسعار المحروقات على خلفية أحداث تونس ، إلا أن قرارها المرتقب بالزيادة في هذه الأسعار بات قريبا و ذلك - على حد تعبير الوكالة - حفاظا على أرواح المواطنين المصريين المقدمين على الانتحار حرقا بالجاز .

على خلفية البوعزيزي واربعة جزائريين ومصري وموريتاني يحرقون انفسهم اعتراضا على حكوماتهم
بيقولك شرطي المرور هيسال بعد كده عن الطفاية وجركن البنزين لانه اذا المواطن اضايق يولع في نفسه فيلحقه اي حد بالطفاية
وبعد كده هنلاقي الامن المركزي بدل ما هو شايل عصيان في المظاهرات يشيل طفايات حريق لاجل المواطنون المزمعين على التوليع في انفسهم
والحزب الطني في برنامجه الانتخابي الجديد هيزود على الاشياء الاساسية لكل مواطن جركن لكل مواطن وبعد كده مكتبة الاسرة هتنزل الولعة للجميع
وذلك كله مصداق المغني الذي يقول اوعى يا واد يا ولعة
وبعد ذلك ننصح كل مواطن انه اذا اضايق او صابه اي مشكلة مع اي واحد لا يضربه ولا يمد ايده على حد والجريمة لاتفيد عليه ان يذهب لاقرب جركن بنزين ويولع في نفسه
ومن المتوقع في الايام القليلة القادمة ان تقوم طائفة السواقين بالاضراب عن العمل لكن الملغز في الامر هما بيضربوا ليه فهناك اشياء ستتوقع في القريب الآجل!! انه لاجل ان المواطنين بيولعوا في انفسهم لما يسمعوا ان اجرة الميني باص بقت ب 1.5 والاتوبيس 1 والميكروباص بقى بيوصل 3و4 جنيه وده كله ضغط على المواطن فبيضر اسفا انه يولع في نفسه مما قد يصيب الكراسي لا سيما اذا اشترك معه زملاءه المواطنين
وهناك توقعات اخرى تقول انهم مضربين لاجل ان البنزين غلي للاقبال الجماهيري عليه
ولا حول ولا قوة الا بالله

المشكلة فعلا أ. أحمد هو احتمال اضراب السائقين أو زيادة غير قانونية للأجرة

و أسعدني مرورك و مشاركتك الفعالة .. جزاكم الله خيرا

هيضربوا دا انا كنت بهزر بس
انا اظن زيادة الاجرة صعب اوي الايام دي يعني انا افتكر اخر زيادة للاجرة اللي ريس طلع فيها قرار كانت فيه بعض المحاولات وباءت بالفشل ولولا قرار الريس ما كنش حد عبر السواقين وبعدين ما هم بياخدوا حقهم تالت ومتلت عاوزين ايه تاني
وبعدين انا مش عارف ليه موجة زيادة الاسعار اللي حاصله في البلد دي مال فين الوزرا المسؤلين
يعني عندك الورق مثلا غلي غلو غير طبيعي لدرجة ان سمعت ان هناك مجلدين ومطبعجية صابتهم البطالة طيب انهي مغفل يساعد على كده دا سوق الورق في مصر معروف انا اعرف ناس بتيجي من لندن تطبع هنا للرخص دا طبعا غير الخليج وغيرهم طيب ليه نضرب صناعة زي دي وغيرها وغيرها الامور بصراحة ساءت والله المستعان
ربنا يستر علينا

غلاء الوقود يصيب باقي السلع بالتبعية سواء الورق أو المواد الغذائية أو الدواء أو خلافه ..

و لو تفتكر آخر مرة زادت فيه الأجرة كان برضه بسبب ارتفاع السولار

و ربك يعدي الأيام الجاية على خير

أعتقد إنه بعد أحداث تونس كل الحكومات العربية هتتحاشى أى زيادة فى الاسعار
وربنا يستر .

ههههه
ليه يا عم ما هو واحد وزير من كام يوم طالع يقولك لا لا اللي حصل في تونس عمره ما يحصل في مصر
وبالعكس اللي حصل في تونس ستدفع اليه الحكومات والشعوب العربية دفعا في القريب العاجل
بعد كلمة هيلاري كلينتون في الدوحة ان شعوبكم يئست من السياسات الراكدة اظن ان المحرك خارجي والكل سيدفع اليه
وهذا تطبيق ما قاله بوش لعنه الله واشفى المسلمين فيه ان الشرق الاوسط بحاجة إلى فوضى خلاقة
الامور مش احنا اللي مسكينها وده اللي يخوف
وربنا يستر على كل البلاد العربية

أسأل الله أن يحفظ مصرنا الحبيبة والعالم العربى والإسلامى من كل سوء ومكروه ، وأن يجنبنا الفتن والخلاف والنفار ، وأن يجمع شملنا ن ويلين قلوب حكامنا علينا ، ويدفعهم إلى العمل بالكتاب والسنة دفعا .